INTEGRAZIO EGUNA ETA AGURRA

Eta konturatu gabe Poloniako azken eguna iritsi da. Oraingo honetan “integrazio eguna” ospatuko dugu, bakoitza bere ikastetxean.

Ursulinek otoitz bat euskaraz entzuteko aukera izan dute eta ondoren gure ikasleei ikastetxea erakutsi digute. Ikastetxea utzi eta pista joko baten bidez Poznaneko txoko eta bazterrak ezagutu ditugu. Bazkaldu ondoren futbol partida bat jokatu dute mutilek. Ez zegoen saririk jokoan, baina bai ohorea; zoritxarrez izugarrizko jipoia jaso dute. Dena den, adiskidetasuna nagusitu da partida ondoren eta ikasle guztiak elkarrekin joan dira bolera batera.

Eskolapioetan, aldiz, tailer ezberdinak izan ditugu elkarri gure kultura erakusteko: dantzak, abestiak, paisaiak, kirolak… Ikasleek izugarrizko gogoa jarri dute! Bertan lortutako irudiak ez dira galtzeko modukoak eta espero gaurko abestiek biharko eguraldian eraginik ez izatea! Indarrak berritu ondoren, tranbia hartu eta Poznanen osteratxoa egin dugu. Hemen ere bazkal ostean ikastetxean futbol partida izan da, baina ohorea mantendu nahian, gure ikasleen lehiakortasuna urrutiegi joan da zenbait jokalditan; mundialeko finala zirudien!! Zorionez, arbitroak bukaera adierazi bezain pronto elkarri eskua eman diote jokalariek. Eta “garrantzitsuena”: partida irabazi dugu azken hamar minututan emaitza irauliz.

Arratsaldeko orduak azken erosketak egin eta maletak prestatzeko erabili ditugu. Gauarekin batera agurrak iritsi dira: besarkadak, opariren bat, muxu ugari eta nola ez, malko batzuk elkarbanatu ditugu. Pena handiz baina itzulerari ekin diogu.

PD: berriro maletekin arazoak izan ditugu, gu bezala, gizendu egin dira eta!!!