Torun

Torun

Asteburuak familiekin pasatzeko aukera eman du, bagenekien bezala. Oso aukera desberdinak izan dituzte ikasleek. Batzuk banaka ibili dira euren familiarekin, irteerak eginez, toki desberdinak bisitatuz, etab. Beste kasu batzuetan taldean ibili dira, euskaldunak eta poloniarrak, mota askotako ekintzak eginez. Igandean eskolapioen ikastetxean Meza Santua izan dute ikasleek. “Berezia” izan dela esan daiteke, gure artean erabiliak ez diren keinuak Polonian oraindik burutzen dituztelako.

Bi egun emankor hauek igaro ondoren, astelehenean denok autobusa hartu eta Torun izeneko hirira joan gara, 3 orduko “paseotxo” baten ondoren. Bidean asteburuko gora-behera eta pasadizo guztiak elkarri kontatzeko aukera ez dute galdu ikasleek.

Torunera iritsitakoan gure artean bekatari asko dagoela ziurtatu dugu, hango dorre berezian egon ondren; jarraian Nikolas Kopernikoren jaiotetxe atarian taldeko argazkia atera dugu. Handik gaileta fabrikara iritsi eta jengibrezko opilak egiten ikasi dugu. Ikasle batzuen parte hartzea oso garrantzitsua izan da eta beraiei esker bakoitzak oroigarri bat eraman du etxekoentzat.

Handik irtendakoan paseotxo bat eman dugu Plaza Nagusiaren inguruan. Berehala iritsi da bazkaltzeko garaia eta bakoitzak bere bidea hartu du. Zeharo harrituta geratu dira ikasleak inguru hauetan bazkaltzea zein merkea ateratzen den ikusita. Eta gainera, lepo janda!

Hiruretan autobusa hartu dugu eta Poznanera itzuli gara. Batzuek tarte hori siesta eder bat egiteko aprobetxatu dute, familiekin dituzten planei indarberrituta ekiteko.

Kalean 3 gradu ditugu, elurra bazter guztietan… eta bihar aquapark batera joango gara…